1. Generelt
Sparebankstiftinga Etne skal opptre uavhengig, langsiktig og open. Stiftinga skal også handle i samsvar med lovar og reglar og eigne vedtak. Tilsette og tillitsvalde skal utføre sine oppgåver og opptre på ein måte som ikkje skadar stiftinga sitt omdømme og tillit. Stiftinga forventar at samarbeidspartnarar, tilskotsmottakarar og leverandørar opptrer etisk forsvarleg - inkludert at dei overheld gjeldande lovar og reglar, respekterer menneskerettane og følgjer internasjonale standardar for miljø og arbeidsmiljø.
2. Forvaltning av midlar
Stiftinga sine midlar skal ivareta stiftinga sitt føremål og skal koma mange til gode over lang tid. Finansforvaltninga vert gjort i samsvar med eigne retningslinjer fastsett av styret. Stiftinga si bruk av midlar skal vere økonomisk og rasjonell. Arrangement og andre utgifter skal vere nøkterne. Misbruk og sløsing med midlar skal ikkje forekomme. Tildeling av midlar skal skje ut frå ei vurdering av kva tiltak som best bidrar til å realisere stiftinga sitt føremål.
3. Ingen personlege fordelar
Tilsette og tillitsvalde skal ikkje tileigne seg personlege fordelar av stiftinga sine midlar, utover det som følgjer av arbeidsavtalar og vedtekne honorar. Tilsette og tillitsvalde skal heller ikkje motta utilbørlege fordelar frå stiftinga sine leverandørar, samarbeidspartnarar eller støttemottakarar. Personlege gåver skal ikkje aksepterast, om det ikkje er reine merksemdsgåver av uvesentleg verdi.
4. Unngå interessekonfliktar
Ingen skal delta i avgjerder som direkte påverkar eigne eller nærståande sine interesser, eller der det føreligg andre spesielle forhold som er eigna til å svekke tilliten til eigen uavhengigheit. Alle som deltar i avgjerder har ansvar for å unngå interessekonfliktar. Tilsette varslar overordna om inhabilitet og tvilstilfelle. Styremedlemmer tar opp mogleg inhabilitet med styret, som avgjer habiliteten. For å synleggjere dei mest aktuelle konfliktområda, vert det ført ein spesiell oversikt over styret og dagleg leiar sine viktigaste relevante relasjonar med stiftinga sine aktuelle forbindelsar og aktivitetsområde. Tilsette og tillitsvalte skal utvise varsemd med investeringar på områder der stiftinga også er engasjert, for å unngå at det kan stilles spørsmål ved om det er ein eigennytte knytt til stiftinga sine investeringsavgjerder.
5. Trakassering aksepterast ikkje
Stiftinga skal ha eit trygt og inkluderande miljø, der diskriminering og trakassering ikkje vert akseptert. Tilsette og tillitsvalde skal ikkje opptre slik at det kan oppfattast som trakasserande , eller bli utsett for slikt.
6. Open kommunikasjon
Sparebankstiftinga kommuniserer opent om si verksemd og sine disposisjonar. Kommunikasjonen skal vera objektiv og sannferdig.
7. Varsling
Eventuelle kritikkverdige forhold i stiftinga skal takast opp, slik at forbetringar kan gjennomførast. Varsling skjer til dagleg leiar eller styreleiar - ut frå saka sin karakter. Den som mottek eit varsel skal orientere sin overordna om varselet og kva tiltak som er sett i verk.
8. Personleg ansvar
Tilsette og tillitsvalde har eit personleg og sjølvstendig ansvar for å følgje desse etiske reglane. Brot på dei etiske reglane kan føre til konsekvensar for arbeidsforhold eller verv.
